இலங்கையின் மீன்பிடி, நீரியல் மற்றும் கடல் வளத் துறையை மேம்படுத்தும் நோக்கில் டென்மார்க் நாட்டின் முன்னணி நிறுவனங்களுடன் சிறப்பு பேச்சுவார்த்தைகள் நடத்தப்பட்டுள்ளன.
மீன்பிடி, நீரியல் மற்றும் கடல் வளங்கள் அமைச்சர் ராமலிங்கம் சந்திரசேகர் மற்றும் அமைச்சின் செயலாளர் டாக்டர் பி.கே. கோலித கமல் ஜினதாச ஆகியோரின் பங்கேற்புடன் இந்த பேச்சுவார்த்தைகள் கடந்த 24ஆம் தேதி டென்மார்கில் நடைபெற்றன.
உலகின் முன்னணி கப்பல் போக்குவரத்து நிறுவனமான MAERSK நிறுவனத்துடன் நடைபெற்ற சந்திப்பில், இலங்கை மீன்வளம் மற்றும் கடல்சார் துறையைச் சேர்ந்த இளைஞர்களுக்கு சர்வதேச கப்பல்களில் (seafarers) வேலைவாய்ப்புகளை வழங்குவது மற்றும் பயிற்சி திட்டங்களை செயல்படுத்துவது குறித்து கவனம் செலுத்தப்பட்டது.
மேலும் டென்மார்க் தொழில் மன்றத்துடன் நடைபெற்ற கலந்துரையாடலில், மீன்பிடி துறையில் நவீன தொழில்நுட்பம், நிலைத்த கடல் சுற்றுலா, புதுப்பிக்கத்தக்க ஆற்றல் மற்றும் நவீன மீன் பதப்படுத்தும் மையங்களை உருவாக்குவது குறித்து கருத்து பரிமாற்றம் செய்யப்பட்டது.
அதேபோல் Impact Fund Denmark உடன் நடைபெற்ற சந்திப்பில், இலங்கையில் உள்ள திட்டங்களுக்கு குறைந்த வட்டி சலுகை கடன்களைப் பெறுவது, குறிப்பாக பசுமை ஆற்றல் மற்றும் மீன் தொழில் திட்டங்களுக்கு முதலீடுகளை ஈர்ப்பது குறித்து பேசப்பட்டது.
இந்த பேச்சுவார்த்தைகள் மூலம் இலங்கைக்கு வெளிநாட்டு முதலீடுகளை ஈர்ப்பதற்கும், சர்வதேச வேலைவாய்ப்புகளை விரிவுபடுத்துவதற்கும் வலுவான அடித்தளம் அமைந்துள்ளதாக அமைச்சர் ராமலிங்கம் சந்திரசேகர் தெரிவித்தார்.
