එයාර්බස් ගුවන් යානා ගනුදෙනුව සම්බන්ධයෙන් ප්රකාශයක් ලබාදීම සඳහා හිටපු ජනාධිපති මහින්ද රාජපක්ෂ මහතාට අල්ලස් හෝ දූෂණ චෝදනා විමර්ශන කොමිසම හමුවේ පෙනී සිටින ලෙස දැනුම් දී තිබේ.
ඒ අනුව එළැඹෙන 12 වැනිදා කොමිසම හමුවේ පෙනී සිටින ලෙස ලිපියක් මගින් දැනුම් දී ඇති අතර, එම ලිපිය අද (09) තංගල්ලේ පිහිටි කාල්ටන් නිවසට භාරදී ඇති බව වාර්තා වේ.
2013 වසරේදී SriLankan Airlines සමාගමට එයාර්බස් A-330 ගුවන් යානා 06ක් සහ A-350 වර්ගයේ ගුවන් යානා 08ක් මිලදී ගැනීමේ ගනුදෙනුවේදී අමෙරිකානු ඩොලර් මිලියන 02ක අල්ලසක් ලබාගෙන ඇති බවට එවක ශ්රීලන්කන් ගුවන් සේවයේ ප්රධාන විධායක නිලධාරී කපිල චන්ද්රසේන සහ ඔහුගේ බිරිඳ නියෝමාලි විජේනායකට චෝදනා එල්ල වී තිබුණි.
විමර්ශන අතරතුර අල්ලස් කොමිසමේ නිලධාරීන් අධිකරණයට දන්වා තිබුණේ, ලැබුණු මුදලින් රුපියල් මිලියන 20ක් එවක සිවිල් ගුවන් සේවා අමාත්ය පියංකර ජයරත්න මහතාට සහ රුපියල් මිලියන 60ක් එවකට ජනාධිපති මහින්ද රාජපක්ෂ මහතාට ලබාදුන් බව කපිල චන්ද්රසේන ප්රකාශ කර ඇති බවය.
කෙසේවෙතත්, ජනාධිපති නීතිඥ රියන්සි අර්සකුලරත්න මහතා අධිකරණයට දිවුරුම් ප්රකාශයක් ඉදිරිපත් කරමින් සඳහන් කර ඇත්තේ අල්ලස් කොමිසමේ නිලධාරීන් තර්ජනය කරමින් එම ප්රකාශ ලබාගෙන ඇති බවයි.
