උඩවලව ජලාශයෙන් පසුගිය මැයි 09 සහ 10 දෙදින තුළ පමණක් කිලෝග්රෑම් 35,000කට අධික මත්ස්ය අස්වැන්නක් ලබාගෙන ඇති බව ශ්රී ලංකා ජාතික ජලජීවී වගා සංවර්ධන අධිකාරිය පවසයි.
එම අස්වැන්නෙහි වටිනාකම රුපියල් එක්කෝටි නව ලක්ෂ නව දහස් තුන්සිය අනූ තුනක් ලෙස සඳහන් වේ.
බලන්ගොඩ ඇතුළු ඉහළ පෝෂක ප්රදේශවලට ඇදහැලුණු අධික වර්ෂාව හේතුවෙන් වලවේ ගඟේ ජල මට්ටම ඉහළ යාම මෙම වාර්තාගත අස්වැන්නට ප්රධාන හේතුව වී ඇත.
ලබාගත් මත්ස්ය අස්වැන්න අතර කැට්ලා කිලෝග්රෑම් 27,030ක්, මිරිගාල් කිලෝග්රෑම් 7,430ක් සහ තිලාපියා කිලෝග්රෑම් 1,009ක් අඩංගු බවද එම අධිකාරිය සඳහන් කළේය.
මෙම අස්වැන්නෙන් ධීවර කාර්මිකයින් 313 දෙනෙකුට ඍජු ආර්ථික ප්රතිලාභ හිමිව ඇති අතර, තවත් පුද්ගලයින් 1,650කට පමණ වක්ර රැකියා අවස්ථා උදාවී තිබේ.
