ශ්රී ලංකාවේ වාණිජ බැංකුවක් වන NDB බැංකුවේ සිදුවූ අභ්යන්තර මුදල් වංචා සිද්ධිය සම්බන්ධයෙන් එම බැංකුවේ කළමනාකරුවෙකු ඇතුළු පුද්ගලයින් කිහිප දෙනෙකු පොලීසිය විසින් අත්අඩංගුවට ගෙන තිබේ.
පොලිස් මාධ්ය කොට්ඨාසය සඳහන් කළේ, අත්අඩංගුවට ගත් සැකකරුවන් වැඩිදුර විමර්ශන සඳහා අපරාධ පරීක්ෂණ දෙපාර්තමේන්තුව වෙත භාරදී ඇති බවයි.
මෙම සිද්ධිය සම්බන්ධයෙන් බැංකුව නිකුත් කළ නිවේදනය අනුව, කිසිදු ගනුදෙනුකරුවෙකුගේ ගිණුම් හෝ තැන්පතු වලට බලපෑමක් සිදුවී නොමැති අතර, සියලුම බැංකු සේවාවන් සාමාන්ය පරිදි බාධාවකින් තොරව පවත්වාගෙන යන බව සඳහන් කරයි.
වංචාව බැංකුවේ එක් මෙහෙයුම් අංශයකට සීමා වී ඇති අතර, එයට සේවකයින් කිහිප දෙනෙකු සම්බන්ධ බව හඳුනාගෙන තිබේ. සිද්ධිය අනාවරණය වූ වහාම අදාළ සේවකයින් තාවකාලිකව සේවයෙන් ඉවත් කර ඇති අතර, සාක්ෂි සහ වාර්තා ආරක්ෂිතව රඳවාගෙන ඇත.
තවද, අදාළ අංශය දැඩි අධීක්ෂණයට යටත් කර ඇති අතර, අභ්යන්තර පාලන හා ආරක්ෂණ පද්ධති තවදුරටත් ශක්තිමත් කරමින් පවතින බවද සඳහන් කරයි.
මෙම සිද්ධියෙන් සිදුවිය හැකි අලාභය නරකම තත්ත්වයකදී වුවද සීමිත මට්ටමක පවතින බවත්, බැංකුවේ මූල්ය ශක්තිය තවදුරටත් ස්ථාවර බවත් බැංකුව අවධාරණය කරයි.
අදාළ සිද්ධිය සම්බන්ධයෙන් ශ්රී ලංකා මහ බැංකුව ද දැනුවත් කර ඇති අතර, අවශ්ය නියාමන අධීක්ෂණ සහ උපදෙස් ලබාදී ඇත.
මෙම සිද්ධිය පිළිබඳ ස්වාධීන විගණනයක් සිදු කිරීමටද තීරණය කර ඇති අතර, මහජන විශ්වාසය ආරක්ෂා කිරීම සඳහා තම කැපවීම අඛණ්ඩව පවත්වාගෙන යන බව බැංකුව පවසයි.
මහජනතාවගෙන් ඉල්ලා සිටින්නේ, තහවුරු නොකළ තොරතුරු හෝ කටකතා ප්රචාරය කිරීමෙන් වැළකී සිටින ලෙසයි.
