ගාල්ල දංගෙදර ප්රදේශයේදී පසුගිය 12 වැනිදා පුද්ගලයෙකු වෙඩි තබා ඝාතනය කිරීමේ සිද්ධියට අදාළව තවත් සැකකරුවෙකු අත්අඩංගුවට ගෙන තිබේ.
ගාල්ල දිසා අපරාධ කොට්ඨාසය විසින් සිදුකරන විමර්ශනවලට අනුව, ඊයේ (29) බණ්ඩාරගම පොලිස් වසමේ මිල්ලගහ හන්දිය ප්රදේශයේදී මෙම සැකකරු අත්අඩංගුවට ගෙන ඇත.
පොලීසිය සඳහන් කළේ, ඝාතනයට ආධාර අනුබල ලබාදුන් බවට සැක කෙරෙන මෙම පුද්ගලයා සන්තකයේ තිබූ අයිස් මත්ද්රව්ය ග්රෑම් 3 මිලිග්රෑම් 810ක් ද සොයාගෙන ඇති බවයි.
මේ අතර, පසුගිය 23 වැනිදා වලාන දූෂණ මර්ධන ප්රහාරක ඒකකය විසින් ද මෙම අපරාධයට සම්බන්ධ තවත් සැකකරුවන් දෙදෙනෙකු අත්අඩංගුවට ගෙන තිබුණි.
අදාළ වෙඩි තැබීම පසුගිය 12 වැනිදා උදෑසන මෝටර් රථයකින් පැමිණි තුවක්කුකරුවෙකු විසින් සිදුකර ඇති අතර, බරපතළ තුවාල ලැබූ පුද්ගලයා ගාල්ල කරාපිටිය රෝහලේ ප්රතිකාර ලබමින් සිටියදී මියගොස් තිබේ. 🚔
