කැරම් බෝඩ් සිද්ධියට අදාළව නීතිපතිවරයා ගොනු කර ඇති අධිචෝදනා පත්රය නීතියට පටහැනි බව ප්රකාශ කර එය බලරහිත කරන ලෙස ඉල්ලා හිටපු අමාත්ය නලින් ප්රනාන්දු ගොනු කළ පෙත්සමක් කරුණු තහවුරු කිරීම සඳහා ජුනි 17 වැනිදා කැඳවීමට අභියාචනාධිකරණය නියෝග කර තිබේ.
මෙම පෙත්සම අද අභියාචනාධිකරණ විනිසුරු මඩුල්ලක් ඉදිරියේ සලකා බැලූ අතර, විත්තිකරු වෙනුවෙන් පෙනී සිටි ජනාධිපති නීතිඥ අලි සබරි අධිකරණයට දැනුම් දුන්නේ අල්ලස් කොමිසම විසින් ගොනු කළ නඩුවකට අදාළව තම සේවාදායකයාට දැනටමත් බරපතළ වැඩ සහිත වසර 30ක සිරදඬුවමක් නියම කර ඇති බවයි.
එම චෝදනාම පදනම් කරගෙන නීතිපතිවරයා විසින් තවත් නඩුවක් ගොනු කිරීම එකම වරදකට දෙවරක් නඩු පැවරීමක් (Double Jeopardy) වන බැවින් එය නීතියට පටහැනි බව ජනාධිපති නීතිඥවරයා පෙන්වා දුන්නේය.
මේ සම්බන්ධයෙන් මහාධිකරණ නඩු විභාගයේදී මූලික විරෝධතා ඉදිරිපත් කළද, ඒවා ප්රතික්ෂේප කර ඇති බවද අධිකරණයට දැනුම් දී තිබේ.
ඒ අනුව, නීතිපතිවරයා ගොනු කර ඇති චෝදනා පත්රය නීතියට පටහැනි බවට තීන්දුවක් ලබාදෙන ලෙස ඉල්ලා මෙම පෙත්සම ගොනු කර ඇති අතර, එය කරුණු තහවුරු කිරීම සඳහා ජුනි 17 වැනිදා යළි කැඳවීමට විනිසුරු මඩුල්ල නියෝග කළේය.
මෙම නඩුවට අනුව, 2015 ජනාධිපතිවරණ සමයේ හිටපු ජනාධිපති මහින්ද රාජපක්ෂ මහතාගේ දේශපාලන කාර්යාල වෙත බෙදාහැරීම සඳහා සතොස හරහා කැරම් බෝඩ් 14,000ක් සහ දාම් ලෑලි 11,000ක් ආනයනය කර බෙදා හැරීමෙන් රජයට රුපියල් මිලියන 39ක පාඩුවක් සිදු කළ බවට චෝදනා එල්ල වී තිබේ. එම චෝදනා යටතේ පොදු දේපළ පනත අනුව නීතිපතිවරයා කොළඹ මහාධිකරණය හමුවේ නඩුව පවරා ඇත.
