මොස්කොව් නුවරට යුක්‍රේනයෙන් දැවැන්ත ඩ්‍රෝන ප්‍රහාරයක්

යුක්‍රේනය විසින් රුසියාවේ මොස්කව් නගරය සහ අවට ප්‍රදේශ ඉලක්ක කර ඩ්‍රෝන ප්‍රහාර 500කට අධික ප්‍රමාණයක් එල්ල කර ඇති බව රුසියානු රාජ්‍ය මාධ්‍ය වාර්තා කරයි. එය “වසරකට වැඩි කාලයකදී සිදු වූ විශාලතම ඩ්‍රෝන ප්‍රහාරය” ලෙසද සඳහන් වේ.

මෙම ප්‍රහාරයෙන් මොස්කව් අවට ප්‍රදේශවල අවම වශයෙන් පුද්ගලයන් තිදෙනෙකු මියගොස් ඇති අතර, තවත් 12 දෙනෙකු තුවාල ලබා ඇති බව රුසියානු බලධාරීහු පවසති.

රටේ ගුවන් ආරක්ෂක පද්ධති මඟින් ඩ්‍රෝන 556ක් පමණ අහසින් විනාශ කළ බවත්, මොස්කව් නගරය ඉලක්ක කර පැමිණි ඩ්‍රෝන 120කට වැඩි ප්‍රමාණයක් බිඳ හෙළා ඇති බවත් රුසියානු ආරක්ෂක අංශ සඳහන් කරයි.

ප්‍රහාරයෙන් Khimki, Mytishchi, Istra සහ Subbotino ඇතුළු ප්‍රදේශවල නිවාස, ඉදිවෙමින් පවතින ගොඩනැගිලි සහ කර්මාන්ත ස්ථාන කිහිපයකට හානි සිදුව ඇති බවද වාර්තා වේ. Sheremetyevo ගුවන් තොටුපොළ ආසන්නයටද ඩ්‍රෝන කොටස් වැටී ඇති නමුත් විශාල හානියක් වාර්තා වී නොමැත.

එමෙන්ම ඉන්දියානු තානාපති කාර්යාලය පවසන්නේ මෙම ප්‍රහාරය අතරතුර මොස්කව් ප්‍රදේශයේදී ඉන්දියානු පුරවැසියෙකුද මියගොස් ඇති බවයි.

යුක්‍රේන ආරක්ෂක සේවය පවසන්නේ මොස්කව් අවට ඉන්ධන සැපයුම් හා කාර්මික පහසුකම් කිහිපයක් ඉලක්ක කර ප්‍රහාර එල්ල කළ බවයි.

සිද්ධිය සම්බන්ධයෙන් දෙපාර්ශ්වයම එකිනෙකාට එරෙහිව ප්‍රහාර එල්ල කරමින් සිටින අතර, රුසියා–යුක්‍රේන යුද්ධයේ උණුසුම් තත්ත්වය තවදුරටත් උත්සන්න වෙමින් පවතින බව ජාත්‍යන්තර මාධ්‍ය වාර්තා කරයි.