ජයන්ත සමරවීර අත්අඩංගුවට ගෙන අධිකරණයට ඉදිරිපත් කරන ලෙස කොළඹ කොටුව මහේස්ත්රාත් පසන් අමරසේන අද (27) නියෝග කර තිබෙනවා.
ජනාධිපති ලේකම් කාර්යාලයෙන් ජාතික නිදහස් පෙරමුණ වෙත ලබා දුන් වාහන අවභාවිතා කළ බව කියන සිද්ධියට අදාළ නඩුව අද කැඳවූ අවස්ථාවේදී ඔහු අධිකරණයේ පෙනී නොසිටීම හේතුවෙන් මෙම වරෙන්තුව නිකුත් කර ඇති බව සඳහන්.
මේ අතර, එම සිද්ධියට අදාළව ඇප මත සිටින මොහොමඩ් මුසම්මිල් ඇතුළු පස් දෙනෙකුට එරෙහි නඩුව සම්බන්ධයෙන් නීතිපති උපදෙස් ලබාගැනීමට යොමු කර ඇති බව අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබෙනවා.
අද පැවති නඩු විභාගයේදී මොහොමඩ් මුසම්මිල් සහ සේනාරත්න ද සිල්වා ඇතුළු සැකකරුවන් අධිකරණය හමුවේ පෙනී සිටි බවද වාර්තා වනවා.
